انا تعبانة اوى يا جدو وبعتلك قبل كدا وانت ماردتش عليا انا كنت بحب واحد ومتعلقه بيه جدا وهو كمان كان بيحبنى كان كل حياتى والموضوع كان كويس والكل موافق عليه قعدنا مرتبطين سنة ونص على امل ان اول لما الظروف تتحسن نرتبط رسمى كنت بتمنى من ربنا ان الموضوع دة يكمل لانى اول مرة احس ان ربنا بيحبنى لانه وصله لكدا ولانه شخص كويس ويعرف ربنا وانا كنت بكون مبسوطة معاه الى حصل يا جدو انه ظروفه ساءت اكتر وقرر اننا ننفصل علشان مش يظلمنى معاه وبعدفترة صغيرة سمعت انه خطب من البلد الى هو فيها لانه مسافر وسمعت ان دة مش اختياره بس اختيار اهله المهم يا جدو انى تعبانة اوى حاسة ان ربنا بيعاقبنى انا بجد كنت بحبه اوى مش مستحمله فكرة انه بقا لواحده تانية بحاول اشغل نفسى فى اى حاجة لمجرد ان اليوم يعدى وخلاص نفسى اعرف مافكرش فيه لانه خلاص مايخصنيش بس مش قادرة بقعد اتكلم على النت مع اى حد القيه علشان اشغل نفسى وبردوا مش عارفة تعبت اوى وبطلب وبصلى لربنا وحاسة انه مش سامعنى ارجوك يا جدو رد عليا انا بجد تعبانة اوووووووووووووووووووى اسفة انى طولت عليك بس امانة ترد عليا بسرعة يا جدو ..............
كوكى
أى تجربة نمر بيها حتى لو كانت قاسية، منسيبش ربنا و ندور على اى حد نتكلم معاه، نمسك فى ربنا ونتكلم معاه
ربنا حنين قوى و بيحبك و بيختار لك الصالح و ربنا مش بيعاقب كل غرضه انه احنا نقرب منه علشان يديلنا الافضل و الاحسن بيمنع عننا حاجات علشان هى مش مناسبانا خالص
زى طفل فرحان بالشيكولاته و عمال ياكل منها طول الوقت، و النهاية هتعمل له تلبك معوى و هيتعب منها، يقوم ربنا بمحبته يمنع عنه الشيكولاته...يزعل الطفل شويه...لكن ربنا يديله الاكل المفيد اللى يكبره و يغذيه ...يمكن الواحد ميفهمشى مشيئة ربنا فى وقتها لكن ربنا صالح و عطاياه صالحة ومن الناحية دى نقدر نفهم ليه ربنا بيعمل كده ...ليه بيحرمنا من الحاجة اللى احنا بنحبها؟ مش يمكن احنا مش بنعرف نختار لنفسنا؟ مش يمكن الموضوع ده لو استمر هنعيش فى مشاكل و تعب؟ ربنا صالح و عطاياه صالحة لينا فى كل يوم و بيحبنا وعايزنا نعيش فرحانين ...نعرف ربنا كويس و نعيش فى توبة و نقرب من التناول و الصلاة و نتكلم مع ربنا فى ادق مشاعرنا...تلاقى ربنا قريب قوى يملا حياتنا بالفرح و العطايا الروحية قبل المادية
ربنا معاكى صلى من اجلى
أضف تعليق