انا بنت فى تالته ثانوى عام مواليد 1994 متقدملى شاب مهندس مواليد 1978 فرق السن بينا 14 سنه و اهلى وافقوا لان قعدت معاه حوالى 4 مرات ومفيش فجوه فى التفكير ما بينا لان كل اللى يعرفنى يقول ان عقلى اكبر من سنى بمراحل و هو متدين و اخلاق و محترم و بسيط جدا و حتى شكله مش واضح عليه فرق السن ده و اتناقشت معاه ان مفيش اى خطوه رسمى تتم الا بعد امتحانات ثانويه عامه قالى اللى هتقولى عليه هقول امين و بابا كان قلقان ان لو حصل نصيب ميخلنيش اكمل لان نفسى ادخل تجاره انجلش رد على بابا رد مقنع جدا قاله انا بكالريوس هندسه هيرضينى ان مراتى تكون بثانويه عامه و اخوتى كلهم كليات قمه و هى متبقاش اقل منهم و قاله قبل ده و ده عتنفع ولادنا و سالنا عليه حسب العادات و التقاليد كل الناس قالت انه ممتاز ومحترم جداو مكنش له اى علاقات سابقه لان كنت خايفه من النقطه دى لان ممكن تسيب اثر سلبى انه يكون غيار او شكاك بس هو اكدلى ان رغم سنه عمره ما فكر يتقدم لوحده واخر قعده اللى هى نتفقق على الحاجات النهائيه كنت انا و هو و بابا و ماما بابا فجاه ساله انت مواليد كام رد عليه 1978 بابا حسبها لقى الفرق 15 سنه مش 14 يعنى حرام هى السنه دى فرقت على حياتناو قاله لا مينفعش بنرفزه رغم احراجه و زعله اللى وضح عليه فى لخظتها قال لبابا كل شى نصيب و دى اعمار يعنى مش ممكن هى ترتبط بيا و تانى يوم يحصلى شى عموما اقبلنى زى ابنك ابقى اجى اسلم عليك و قال لماما انه عمره ما فكر فى الجواز و انه هيلغى الفكره دى تماما طالما الانسانه اللى ارتاحتلى و ارتاحتلها مش هتوفق معاها و مشى بعدها بعتلى رساله بيقولى انا اول مره اكون عاجز كده انا سايب حياتى من اولها على ربنا و اتمنيتك شريكه حياتى و حبيتك بجد متستسلميش و اقنعى باباكى انا مش عاوز اخسرك بعد ما لاقيتك انا مش عارف اعمل ايه لو انتى مش ليا انا هلغى فكره الارتباط من حياتى ارجوك ساعدنى ياجدو بحمتك انا عاوزه ارشاد السماء احنا اتفقنا هنصوم التلات ايام اللى جايين و العدرا تمد ايديها لان هو شافنى فى العدرا و هى اللى سمحت اسفه طولت عليك بس عاوزه ارشادك و نصيحتك لكن ارجوك متتاخرش عليا لان تعبت
دودو
بصى فرق السن كبير فعلا، لكنه لا يمنع من الزواج
انتى لسة صغيرة و الفروق دى مش هتعرفيها غير بعد سنين، مثلا هوه هيعجز قبل على الاقل بعشر سنين، و ده هيخلى كتير من الشغل يكون من نصيبك
ممكن كمان انه يكون فرق السن بينه و بين الاولاد كبير، فيكون فيه جاب فى التفكيير بينه و بين الاطفال إلا اذا كان يتمتتع بشخصية تسمح انه يلاحق اطفاله فى تطور فكرهم ويجاريهم فى العابهم و حركتهم و طموحاتهم
بعض تصرفاتك مش هتعجبه لانك هتكونى منطلقة اكتر منه، جرى و فسح و رحلات، لكنه هيحب الهدوء و التأمل و كده
لازم تبقى عارفة كده من الاول علشان متتصدميش
لكن فى النهاية الحب هوه اللى بيتغلب على الحاجات دى لو حصل نصيب
الجزء المهم هوه ان باباكى راجل عاقل و بيحبك علشان كده اخد القرار ده، انتى إفضلى صلى و شوفى ربنا عايز ايه ليكى، لكن متطلبيش من ربنا يا إما ده ...يا بلاش!!
دخلى ربنا لكن متفرضيش إختيار و إشكرى ربنا على كل اللى يديهولك و قولى لتكن مشيئتك
وربنا هيتدخل و إذا كنتى بتقولى انه انتى عقلك أكبر من سنك يبقى ده سبب مهم انك تسمعى لأهلك و لصوت ربنا فى حياتك حتى لو كان عكس إرادتك ....وإذا كان من نصيبك ربنا هيفرحك ....هيفرحك فى كل الاحوال، بس نشكره على اللى يجبه و اللى يبعده
أضف تعليق