هاى جدو كرمشه ازى حضرتك يارب تكون بخير كل سنه وانت طيب معلش هاتعبك معايا بس انا عندى 19 سنه عمرى ماحبيت فحياتى ابدا كان دايما صحابى فى سن إعدادى وثانوى يقولوا انا بحب فلان والتانيه تقول انا بحب فلان وانا عمرى ماكنت بحث بأى حاجه تجاه اى ولد لكن كنت اعد اطلع على نفسى كلام واقول انا بحب فلان علشان ابقى زيهم لكن جه ولد وقالى انا بحبك اتبسط قوى فى الأول وقولتله وانا كمان رغم انى مافيش جوايا حاجه حاولت احبه وفعلا كنت بحاول كتير بس قعدت فتره مبسوطه
وبعدها حسيت انى مخنوقه للعلاقه دى وان ممكن ماينفعش نكون لينا نصيب لبعض ولما قولتله كده تعب قوى وزعل لأنه كان بيحبنى بقاله 4 سنين ومقاليش غير السنادى تعب قوى وانا علشان مازعلهوش قولتله لا انا كمان بحبك واللى حصل ده خلاص انساه لكن انا من جوايا تعبان مش عارفه اخد قرار كل ماقول لصحابى كل حد يقولى رأى غير التانى بقيت مشتته مش عارفه اركز ولا عارف اخد قرار فحياتى تعبت قوى وطالبه إرشادك تانى حاجه معلش طولت عليك بس اتحملنى بقى انا حد مستهتر قوى وبعيد عن ربنا قوى حاسه انى تعبانه نفسى اقرب من ربنا لكن الشيطان مسيطر عليا كل ماعد مع اب اعترافى واجى اعترف بخطيه الشيطان بيزلنى بيها الاقى نفسى اقول لا ممكن ابونا ياخد عنى فكره وحشه واروح ساكاته تالت حاجه والأخيره خلاص علشان مش تزهق منى وتقول ايه البت الرخمه دى انا حاسه ان جوايا فراغ كبير قوى خصوصا انى كنت فى ثانويه عامه وماجبتش مجموع وفى البيت عندى ضغطوا عليا وخلونى ادخل جامعه مفتوحه وطبعا لا فيه مذااكره ولا نزول الجامعه غير يوم فى الأسبوع حاسه ان جوايا فراغ جامد وبسبب كده ممكن اعدد اخترع لنفسى مشاكل واقول لصحابى ده انا عندى وحصل وحصل ومايكونش فيه حاجه بس بعمل كده علشان اخليهم يسألوا عليا ويكونوا دايما معايا انا بحبهم قوى صحابى هما كل حاجه فحياتى بس ببقى مضايقه انى بكدب عليهم وانى بقول انى عندى مشاكل واقلقهم عليا بس فنفس الوقت ببقى محتاجه احس بوجودهم جمبى دايما احس انى مكروهه بين الناس مع انى عارفه هما قد ايه بيحبونى وانى غاليه عندهم لكن الاحساس ده بيجيلى كتير جدو بجد انا محتاجه مساعدتك انا حاسه إنى بضيع بجد لأنىى بسبب الفضا ده بدأت افتح مواقع مش كويسه على النت واخدت تدريب من اب اعترافى انى ابطل ده وفعلا بطلت بس انا فعلا من جوايا تعبانه قوى وحاسه انى مجروحه وكمان حاولت كذا مره انتحر لكن ربنا ماأرادش انى اموت جوا انا بجد تعبانه وماصدقت لاقيت حد افضفض معاه محتجالك قوى ارجوك إرشدنى بنتك بتضييييييييييييييع
مرمر
أجمل حاجة عندك صراحتك و كمان انه عندك اب إعتراف بتروحيلة فميتخافش عليكى الموضوع بسيط جدا و هو انك لازم تشبعى من ربنا يسوع المسيح يملا الفضا و الفراغ ده، كل واحد فينا فيه الفراغ ده لو بعيد عن ربنا بس يقرب من ربنا يسوع المسيح يملا الفراغ و يفيض.
....فاكرة قصة السامرية؟ اكيد سمعتيها كتير و كتير هى كمان كانت عندها الفراغ ده علشان كده ربنا يسوع لما قابلها قاللها عالدوا اللى هوه الماء الحى اللى يشرب منه ميعطشى تانى و مش كده و بس لأ يفيض و يشبع اللى حواليه، يبقى شبعان و فرحان.
ساعات بنبقى عاملين زى حد جعان قوى و بدل مايروح البيت بتاعه و عنهم عزومة جامده موت....بدل كده يروح على ناصية الشارع فيه صندوق زبالة يقتح و يدور وسط الزبالة على لقمة ناشفة ياكلها....لازم اقول لأ انا بيتى هو كنيستى اللى فيها شجرة الحياة اللى ياكل منها يحيا للأبد و هو جسد ربنا يسوع المسيح اكل منه و احيا للأبد، اكل منه و اثبت فيه اكل منه و افرح و اشكره على عطيته العظيمة لى و لكل واحد، ده سر الاسرار ...ده سر الشكر...ازاى اسيب المسيح اللى ترك مجده علشانى، ازاى اترك ملك الملوك و رب الارباب الى خلق كل الدنيا اللى مله مالهوش نهاية و اسيبه و ابيعة بتمن بخس، بموقع مقرف ولا علشان كدبة ولا علشان شهوة..!!!! لأ دانا مش هاسيبه و هامسك فى هدومه ولن ارخه عنى، ده حبيبى حلقه حلاوة و كله مشتهيات، مش هسيبه لان كل اللى لمسوه نالوا الشفاء، شفاء لامراضهم الجسدية و الروحية و النفسيه، هخليه يدخل بيتى
(نَشِيدُ الأَنْشَادِ 1 : 16) ها انت جميل يا حبيبي و حلو
ده لما دخل بيت زكا...حصل خلاص لهذا البيت، اوعى تفتكرى انه الحياة مع المسيح صعبة دى اسهل من السهولة، القديس بولس الرسول يقول
(أَعْمَالُ الرُّسُلِ 27 : 15) سلمنا فصرنا نحمل..
بس نسلم حياتنا و نشرك ربنا يسوع فى كل امورنا و مشاكلنا و ضيقاتنا وشوفى هوه هيعمل ايه
امابالنسبة لموضوع الحب: ياريت تصارحيه بحقيقة مشاعرك علشان متخدعهوش و بعدين انتى لسه كتكوته على الحب استنى شويه لما مشاعرك تنضج و علاقتك بربنا تكبر و ساعتها ربنا هيبعت لك الشخص المناسب اللى تحبيه من قلبك وربنا يبارك حبك لك و يفرحك