ازيك يا جدو وازاى صحتك يارب تكون بخير دايما انا كنت عايزه اخد رائيك فى موضوع يا جدو بس ياريت ترد على موضوعى علشان خاطر المسيح انا سنى 18 سنه وبحب واحد اوى هو اكبر منى بسنتين يعنى 20 سنه هو انا بحبه جدا بس المشكله انه هو بتاع بنات وبيكلم بنات كتير اوى ومنهم اصحابى اللى بيكلمهم هو زمان كان عايز يكلمنى وطلب من اصحابى الايميل بتاعى بس هما ماوافقوش وقالوله لا هى مش بتاعت الكلام ده ومبتكلمش حد خااالص وانا سدقنى فعلا كده يا جدو انا مش بتباهى بنفسى بس انا عمرى مكلمت حد فى حياتى ومعروفه بادبى بس جيت اليومين دول بفكر فيه اوى مش عارفه ليه هو ينفع يا جدو ارتبط بيه انا هقولك العيوب اللى مخليانى متردده وانت قولى رائيك اولا انه بيكلم بنات كتير وبصباص ثانيا مستواهم الاجتماعى والمادى متوسط لا اغنياء ولا فقراء عاديين انا بقى المستوى المادى عالى والاجتماعى برضه هل اضحى بالفلوس علشان الحب ارجوك قولى اعمل ايه انا بحبه حب فوق الوصف مش عارفه اعمل ايه
جين
الصحة تمام... طول مالرب فى الأمام.....زى ما قال داوود زمان...جعلت الرب امامى فى كل حين لكى لا اتزعزع
لما تكونى نازلة تشترى حاجة بتروحى على اول محل و تشترى و لا بتلفى شويه و تشوفى ايه المناسب و ايه الاذواق الموجودة و الاسعار و الالوان؟ غالبا ما بنلف شويه...و أنا حاسس من كلامك إنك ناويه تشترى من اول محل و موضوع الارتباط لايقارن خالص بفستان او بلوزة هتلبسيها شويه و تزهقى منها....الإرتباط لازم له شروط
أولا السن...18 و 20 مش موافقانى انه ليه شويه على قصة الارتباط دى يعنى ممكن تتأجل شويه لغاية مثلا لما الخطيب اللى هيبقى زوج يتخرج و يقدر يبقى مسؤول عن اسرة ماديا و فكريا و ينفصل تماما عن أسرته زى ما الكتاب المقدس بيقول لنا....يترك الرجل أباه وأمه و يلتصق بإمراته....ولا عايزاه ياخد المصروب من بابا...طب لو بابا إداله تايم اوت و منع المصروف هنعمل ايه بقى ؟
ثانيا المستوى الاجتماعى و إنه الاسرتين لازم يبقوا من نفس المستوى وإلا طنط فلانه هتعاير طنط علانة إنها يتعمل صوت و هى بتشرب الشوربه، و انكل فلان هيقول على عم فلان انه فلاح و مبيفهمش فى الاتيكيت:) و غيره
ثالثا المستوى الثقافى وده مهم هل الزوج المرتقف دخل كلية مناسبة و لا لأ....ولا مكملش تعليمه و انتى دخلتى كلية طب و فى المستقبل حضرتى دكتوراه فى الاورام مثلا....ايه المواضيع اللى هتتناقشوا فيها مع بعض، انتى بتحبى تروحى الاوبرا و هو بيحب يقعد على قهوة السعادة و إصحابة هما سعيد المكوجى و انتى صاحبتك بنت وزير الصحة (مع كامل الاحترام لكل المهن) هل أصحابك هيقدروا يتفاهموا مع أصحابه.
رابعا و هى أهم حاجة و المفروض تيجى بدل أولا....وهى أيه مستواه الروحى الشاب البصباص ده اللى كل مايشوف واحده احلى يسيبها و يشوف ويحاول يتعرف على الجديدة؟ أيه علاقته بربنا؟ بيحضر قداسات ولا لأ؟ له اب إعتراف؟
إذا كنتى بنت جد، يبقى لازم تتعرفى على شباب جاد من ولاد ربنا...إصبرى لبعد الكليه و أمور كتير هتوضح ليكى.