مالييش نفس اذاكر خالص

تعطيل النجومتعطيل النجومتعطيل النجومتعطيل النجومتعطيل النجوم
 

سلام المسيح معاك يا جدو معلهش انا هطول شويه بس ياريت الاقى حل لمشكلتى دى (انا يا جدو حصلتلى ظروف صعبه جدا وهى انى كنا مسافرين بالعربيه وحصلتلنا حادثه واتوفت فى الحادثه دى ماما واخواتى الاتنين وما طلعناش من الحادثه دى غير انا وبابا بس بعد الحادثه دى انا وبابا قعدنا مع تيته وبعدين بابا اتجوز وبرضه قعدت مع تيته ماقدتش اسيبها واتعلقت بتيته دى لدرجه ماتتوصفش لانها كانت طيبه جدا وبتحبنى وعلمتنى التدين لانها كانت ست قديسه جات من شهر كده اتوفت مش قادره اوصف حالتى من سعتها وانا مش مصدقه وفى حالة انهيار والمشكله الكبيره انى فى ثانويه عامه والامتحانات فاضل عليها شهرين وانا مش بفتح كتاب وخايفه جدا نفسى اجيب مجموع كبير وادخل الكليه اللى نفسى فيها لانى لو المجموع راح يبقى كل حاجه راحت منى ارجوك ساعدنى يا جدو قولى اعمل ايه وانا اسفه انى طولت شكرا خالص.
مريم

انا مش هأقدر أخفف عليكى او أعزيكى لأن دى تجربة صعبة قوى..بس اللى أقدر أقوله ...ان ربنا بيخص الناس العظام  بس بالتجارب الصعبة دى علشان يعدهم لخدمته و يصنع منهم أعمدة حية فى كنيسته وفى سماه

زى تجربة الست العذراء و رؤيتها لإبنها و هو على الصليب وزى التجارب الكثيرة اللى عدى فيها سيدنا البابا شنودة وإزاى اتولد يتيم من الام و باباه إتجوز وهو اللى رباه أخوه الكبير
الكتاب بيقول: تأديبا أدبنى الرب و الى الموت لم يسلمنى....التجارب صلبان اللى بستحملها بشكر ينال أكاليل كبيرة فى السما و يشوف تعزيات كبيرة على الأرض...اطلبى من ربنا التعزيات دى تفرح قلبك. و التعزيات تكون بمقدار شكرنا على الألم و على التجارب.

ربنا يسوع المسيح يقول: فى العالم يكون لكم ضيق...لكن ثقوا أنا قد غلبت العالم. وإحنا أولاده نتمتع بالغلبة و الانتصار ده فى ربنا يسوع المسيح.

معلمنا يعقوب الرسول يقول: يعقوب ١:‏٢ اِحْسِبُوهُ كُلَّ فَرَحٍ يَا إِخْوَتِي حِينَمَا تَقَعُونَ فِي تَجَارِبَ مُتَنَوِّعَةٍ
ليه؟...لأن
٣‏عَالِمِينَ أَنَّ امْتِحَانَ إِيمَانِكُمْ يُنْشِئُ صَبْرًا. ٤‏وَأَمَّا الصَّبْرُ فَلْيَكُنْ لَهُ عَمَلٌ تَامٌّ، لِكَيْ تَكُونُوا تَامِّينَ وَكَامِلِينَ غَيْرَ نَاقِصِينَ فِي شَيْءٍ.
يعنى من الآخر ربنا عايونا نكون كاملين و غير ناقصين فى شىء، زى البستانى اللى بيقلم الشجر، يشيل عود ناشف ..يقصص شويه ورق، يمكن يكون ده مؤلم لكن فى النهاية بحكمته غير المتناهية يطلع شجرة مفيهاش عيب.

ربنا يفتح عينك على حكمة ربنا شوية بشوية
يوحنا ١٣:‏٧ أَجَابَ يَسُوعُ وَقَالَ لَهُ:"لَسْتَ تَعْلَمُ أَنْتَ الآنَ مَا أَنَا أَصْنَعُ، وَلكِنَّكَ سَتَفْهَمُ ‍فِيمَا بَعْدُ".
اما عن المذاكرة...فدى لازم تحطيها بالكامل على ربنا يسوع المسيح...فى صلاتك قوليله..أنا بشكرك على كل حاجة بتدهانى بس من فضلك اسندنى فى التجربة الشديدة دى لأنها صعبة على ...انا أشكرك و انت تسندنى ولازم أحس بإيدك و بنعمتك تسندنى...وهتشوفى إيد ربنا الحنينة هتعمل ايه
أيوب ٥:‏١٨ لأَنَّهُ هُوَ ‍يَجْرَح وَيَعْصِبُ. يَسْحَقُ وَيَدَاهُ تَشْفِيَانِ.

أضف تعليق


كود امني
تحديث

تم التطوير بواسطة شركة ايجى مى دوت كوم
تصميم مواقع مصر - ايجى مى دوت كوم