لما اروح أعترف مش بكمل 3 دقايق

سلام ونعمة يا جدو

أزيك

يا رب تكون بخير.. بركة سيدنا القديس البابا شنودة تكون معاك يا جدو

لو سمحت يا جدو عايزة اخد رايك فى حاجة

انا بقالى كذا مرة لما اروح أعترف مش بكمل 3 دقايق ...  و اخر مرة أبونا قال لى دقيقة بالضبط و بسرعة بسبب مشغوليته الشديدة.. و فعلا بعد دقيقة حط الصليب على راسى ...

انا عاذراه جدا و مقدرة مشغوليته بس انا لسه مش بكون خلصت و بيكون عندى حاجات اقولها...

يا ترى هل فيها حاجة لو اعترفت عند أب كاهن تانى و فضلت مع أبويا ( لأنه أبويا , أب اعترافى من و أنا صغيرة و انا باعزه جدااا) ؟؟

بس أنا بأحس ان عايزة اطلع كل خطاياى قدام ربنا فى الاعتراف ... و صدقنى يا جدو أنا مش غاوية رغى .. انا بأروح أرص الخطايا و أخلص ...

أنا بأعتبر ان أنا قلت كل حاجة طالما انا كلمت ربنا و فى نيتى أقولها .. حتى لو ملحقتش أعترف بيها قدام أبونا .. هل كده صح و لا غلط ؟؟ بس أنا مش مرتاحة ..حاسة انى كده مقصرة مع ربنا ..

متقوليش حاولى تلاقى وقت مناسب لأبونا لانه دايما مشغولياته كتييييرة .. انا حاولت و معرفتش ..

ايه اللى المفروض اعمله ؟
مرمر

مش المهم تفاصيل الخطية ايه...المهم انه ابونا يفهم ايه هى الخطية حتى لو قلت كلمة واحدة علشان يدينى الارشاد اللازم للخطية دى
والاهم هو التوبة اللى من القلب عن الخطية قبل الاعتراف..لانه اسمه سر التوبة و الاعتراف و التوبة تسبق الاعتراف....مهم انه أقف قدام ربنا و أقدم توبه وأعلن إنسحاقى قدام ربنا و مفيش كلام أجمل من المزمور الخمسين...إرحمنى يالله كعظيم رحمتك...بعد التوبة الحقيقية يجى دور الاعتراف أمام الله فى حضور اب الاعتراف اللى يدينى الارشاد المناسب للخطية اللى بعترف بيها مش مهم زى ماقلت لك كتر الرغى المهم كلمتين فى المفيد يقدر ابونا يفهم منى ايه اللى عايز اقولة علشان يدينى الحِل بكسر الحاء و الحَل بفتح الحاء...زى ما قال قداسة البابا مثلث الرحمات الانبا شنودة الثالث ربنا يرحمنا و يسامحنا بصلواته قولوا جميعا آمين، الحل من الخطية و الحل لمشكلتى بالتداريب المناسبة زى الصلاة  والصوم و التناول و الجهاد و الميطانيات ...كل واحد و حالته الروحية و اللى يقدر عليه و اللى واخد الموضوع جد بيتقدم فى حياته الروحية لأن ربنا بيشوف امانته و يباركه.

• السابق
• التالي