تعبت ويئست من الدنيا

تعطيل النجومتعطيل النجومتعطيل النجومتعطيل النجومتعطيل النجوم
 
المجموعة: ركن جدو كرمشة الزيارات: 26057

ازيك يا جدو انا بعتلك قبل كده انا صاحبة موضوع الحادثه اللى حصلتلنا وماتت فيها ماما واخواتى وبعدين جات تيته من 6 شهور ماتت وقولت لحضرتك انى فى ثانويه عامه وتيته ماتت قبل امتحانات الثانويه العامه بشهرين وكانت حالتى النفسيه زى الزفت لانى كنت متعلقه بيها جدا هى اللى ربتنى من بعد ماما فكنت باعته المشكله لحضرتك علشان الامتحانات وانى مش قادره اذاكر فقولتلى حطى المذاكره على ربنا وهيقف معاكى احب اقولك يا جدو انى انا خلاص دخلت الامتحانات وماامتحنتش غير مادتين بس وسبت تلاته يعنى هدخل سنه تانيه تانى ومن ساعتها والدنيا ضلمت اكتر فى وشى ونفسى اموت لانى بجد تعبت خلاص انا هدخل صيدله خاصه بس انا كان نفسى يا جدو اجيبها من مجموعى زى بقية زمايلى وافرح زيهم دلوقتى حتى زمايلى مش قادره اشوفهم ولا اكلمهم السؤال دلوقتى يا جدو ليه ربنا نسينى ليه حجب وجهه عنى انا خلاص كل حاجه يعتبر راحت ماما واخواتى وتيته اغلى حاجه فى حياتى ومستقبلى الدراسى وغير حالتى النفسيه اللى انا فيها وبعدت عن ربنا خالص من ساعة الامتحانات يعنى حتى حالتى الروحيه ضاعت ايه فى تانى يا جدو فى الدنيا ممكن الواحد يقعد فى الدنيا علشانه انا اسفه انى طولت بس بجد نفسيتى متدمره جدا والف شكر
مرمر

تجربة صعبة قوى و مش سهلة خالص، وانتى بتقولى ليه  ربنا حجب عنك وجهه؟ ...على فكرة ربنا مش بيدى التجارب القوية دى إلا لجبارين البأس الكتاب المقدس بيسميهم جبارين البأس، أو أبطال الايمان...هما دول اللى يقدروا يستحملوا التجارب دى ويطلعوا منها أقوياء....تقوليلى دا انا بتمنى الموت...اقولك التجربة صعبة يا حبيبة قلب ربنا.. و وقت التجربة بننسحق تماما تحتها لكن لينا رجاء فى ربنا اللى اقوى منها و يقدر يخرجنا منها... ويخرج من الجافى حلاوة.
القضاة ١٤:‏١٤ فَقَالَ لَهُمْ: "مِنَ الآكِلِ خَرَجَ أُكْلٌ، وَمِنَ الْجَافِي خَرَجَتْ حَلاَوَةٌ"
لأنه عنده من الموت مخارج...المزامير ٦٨:‏٢٠ اَللهُ لَنَا إِلهُ خَلاَصٍ، وَعِنْدَ الرَّبِّ السَّيِّدِ لِلْمَوْتِ ‍مَخَارِج
الحاجة الجميلة اللى تختبريها هى أنه ربنا هو الاب و الام و الصديق، والتيتة اللى كانت قريبة منك و تطلبى منه كل حاجة كنتى بتطلبيها منهم، حتى لو حاجة شايفاها تافهة و حتختبرى محبة ربنا قد ايه انها غير محدودة وهتفرحى قوى بإنه أب حنين و قريب من قلبك ...بس إطلبى منه وجربى

المزامير ٦٨:‏٥ أَبُو الْيَتَامَى وَ‍قَاضِي الأَرَامِل،

إتأكدى إنك غالية جدا على قلبه و لسة المشوار قدامك كبير، الفرح بالنتيجة وقتى لكن الفرح بمعية المسيح حاجة تطير العقل، مدبر الكون ده كله بيحبنى انا و انا مصدر إهتمامه و بيحصرنى بمحبته ...حاجة تخلى العقل يطير فعلا
الامثال ١٨:‏٢٤ اَلْمُكْثِرُ الأَصْحَابِ يُخْرِبُ نَفْسَهُ، وَلكِنْ يُوجَدْ مُحِبٌّ أَلْزَقُ ‍مِنَ الأَخ

هوه ده المحب الألزق من الأخ....صديق فريد فى محبته، مات من أجلنا و أحبنا و إحنا لسة فى خطيتنا. أحبنا و إحنا جاهلين به و بحبه.

لمت ختبرى محبة المسيح ليكى هتعرفى ليه هو عمل كده...ودى هتيجى واحدة واحدة وفيه ظروف هنفهمها منه شخصيا فى السما، بس المهم نحيا السما دى على الارض من خلال علاقتنا الشخصية مع مدبر هذا الكون، الحكيم.

ربنا يفرح قلبك ويملا حياتك من كل نجاح و دايما طمنينا على أخبارك